मुल्ला नसरुद्दीन आणि माजुद्दीन एकदा नदीच्या शांत काठावर गळ टाकून बसले होते.
मुल्ला नसरुद्दीन म्हणाला, माझ्या आजोबांची गोष्ट माहितीच असेल ना तुला? याच जागेवर ते गळ टाकून बसायचे. एक दिवशी एका मोठ्या जहाजाएवढ्या मोठ्या आकाराचा मासा लागला होता त्यांच्या गळाला.
आपल्या छोट्याशा नदीत जहाजाएवढा मासा कसा आला असेल, याचा विचार करत माजुद्दीन थोडा वेळ गप्प राहिला. नंतर म्हणाला, अरे माझ्या आजोबांची गोष्ट ठाऊकाय ना तुला? तेही इथेच बसून गळ टाकायचे. एकदा त्यांच्या गळाला एक कंदील लागला होता. तो ना औरंगजेबाचा कंदील होता आणि आजोबांना सापडला, तेव्हाही तो पेटलेला होता, बोल.
मुल्ला थोडा वरमून म्हणाला, माजुभाई, तुम्ही तो कंदील थोडा अलीकडच्या काळात आणून विझवायला तयार असाल, तर मीही आमचा मासा मोठ्या सुरमईच्या आकारापर्यंत कमी करायला तयार आहे!!!
एकमेकांशी आपापल्या धर्माच्या श्रेष्ठत्वावरून झगडणारे लोक साधारण अशीच चर्चा करतात... आपले दावे फारच अतर्क्य आणि फेकाफेकीचे आहेत, याची त्यांनाही कल्पना असते...
फक्त आधी दुसऱ्याने कमी फेकावे, मग आपणही कमी फेकू, अशी त्यांची अपेक्षा असते.
No comments:
Post a Comment